Dan 8 | NdeIBE | STEP | Ngomnyaka wesithathu wokubusa kwenkosi uBhelishazari mina Danyeli ngaba lombono ohambelana lalowo owake wangifikela ngaphambili.

Daniel 8

Umbono KaDanyeli Owenqama Lembuzi

1 Ngomnyaka wesithathu wokubusa kwenkosi uBhelishazari mina Danyeli ngaba lombono ohambelana lalowo owake wangifikela ngaphambili. 2 Embonweni wami ngazibona ngisenqabeni yaseSusa esigabeni sase-Elami; embonweni ngangisekhunjini lomgelomfula u-Ulayi. 3 Ngakhangela, ngabona khonapho phambi kwami kwakulenqama elezimpondo ezimbili imi eceleni komgelomfula, izimpondo zazinde. Olunye lwezimpondo lwalulude kulolunye kodwa muva lwakhula kakhulu.

4 Ngayibukela inqama ihlasela isiya entshonalanga, lenyakatho leningizimu. Kwakungelanyamazana eyayingamelana layo, kungekho njalo ongalamulela emandleni ayo. Yazenzela ngokuthanda kwayo yaba yinto enkulu.

5 Ngilokhu ngicabanga ngalokhu, masinyane kwathutsha imbuzi entshonalanga ilophondo oluqaphileyo phakathi kwamehlo ayo, idabula phakathi komhlaba wonke ingathintanga umhlabathi. 6 Yasondela enqameni yempondombili engayibona imi ekhunjini lomgelomfula yayihlasela ngolaka olukhulu.

7 Yayidumela inqama ngodlakela yayigqubula yavikiza izimpondo zombili. Inqama yayingelamandla okumelana layo; impongo le yayilahla phansi inqama yayigxobagxoba, kungekho ongayilamulela emandleni ayo.

8 Impongo (imbuzi) yaba lamandla amakhulu, kodwa kwathi amandla ayo esemakhulu kangako uphondo lwayo olukhulu lwephuka, endaweni yalo kwakhula izimpondo ezine eziqaphileyo ezakhula zakhangela kuwo wonke amagumbi amane omkhathi.

9 Kolunye uphondo lwayo kwathutsha olunye uphondo olwaqalisa luluncinyane kodwa lwakhula ngamandla kusiya eningizimu, lasempumalanga laseLizweni Elihle. 10 Lwakhula lwaze lwafinyelela izinkanyezi zezulu, lwaphosela phansi emhlabeni ezinye izinkanyezi lwazigxobagxoba.

11 Lwaziphakamisa lwazenza lukhulu njengeNkosana yezinkanyezi; lwamisa umhlatshelo wakhe wansuku zonke lendawo yakhe yokukhonzela yangcoliswa. 12 Ngenxa yomvukela, ixuku labangcwele, kanye lomhlatshelo wansuku zonke kwanikelwa kulo. Lwaphumelela kukho konke olwalukwenza, iqiniso alabe lisatsho ulutho.

13 Ngase ngisizwa ongcwele ekhuluma, omunye ongcwele wathi kuye, “Kuzathatha isikhathi esinganani ukuze umbono lo ugcwaliseke – umbono omayelana lomhlatshelo wansuku zonke, lomvukela oletha incithakalo, lokukhalala indawo yokukhonzela, lezinkanyezi ezizagxotshwagxotshwa?”

14 Wathi kimi, “Kuzathatha izikhathi zokuhlwa lezokusa eziyizi 2,300; lapho-ke indawo yokukhonzela izangcweliswa kutsha.”

Incazelo Yombono

15 Kwathi mina Danyeli ngilokhu ngiwubukele umbono lo, ngizama ukuwuzwisisa, kwema khonapho phambi kwami othile owayefana lomuntu. 16 Ngasengisizwa ilizwi lomuntu limemeza lisuka e-Ulayi lisithi, “Gabhriyeli, tshela umuntu lo incazelo yombono lo.”

17 Wathi esondela engangimi khona ngezwa ngisesaba kubi ngawa ngathi thwitshi. Wathi kimi, “Ndodana yomuntu, zwana ukuthi umbono umayelana lesikhathi sokucina.”

18 Wathi esakhuluma lami, ngalala ubuthongo obunzima ngithe mbo phansi ngobuso. Wasengithinta wangiphakamisa wangimisa ngezinyawo zami.

19 Wathi, “Ngizakutshela okuzakwenzakala ngemuva, ngesikhathi esimisiweyo esokucina.

20 Inqama empondombili owayibonayo imele amakhosi eMede lePhesiya. 21 Impongo eyisinephu yinkosi yeGirisi, lophondo olukhulu oluphakathi kwamehlo ayo yinkosi yakuqala.

22 Izimpondo ezine ezathatha indawo yalolo olwephukayo zimele imibuso emine ezaphuma esizweni sakhe kodwa kayiyikuba lamandla alingana lawaso.

23 “Lapho umbuso wabo ususiya ekucineni, abahlamuki nxa sebexhwale beqisa, inkosi elolunya, eliqili kakhulu, izavela. 24 Izaqina kakhulu kodwa kungasikho ngenxa yamandla ayo. Izakwenza umonakalo wokubhidliza okukhulu, iphumelele kukho konke ekwenzayo. Izawabhubhisa amaqhawe kanye labantu abangcwele. 25 Izakwandisa inkohlakalo, izibone yona isedlula bonke abanye. Bazakuthi besithi sebezinzile, izabhubhisa abanengi ibe isihlasela iNkosi yamakhosi. Ikanti yona izabhujiswa kodwa hatshi ngezandla zomuntu.

26 “Umbono owuphiweyo owezikhathi zokuhlwa lezokusa uliqiniso, kodwa ugcike umbono lo, ngoba uphathelane lesikhathi esizayo esikhatshana.”

27 Mina Danyeli, ngadinwa kakhulu ngalala ngingogulayo okwezinsuku ezimbalwa. Ngasengivuka ngaqhubeka ngomsebenzi wami wenkosi. Ngadideka ngombono lowo; wawungaphezu kwengqondo.